Nega sizga uy loyihasi KERAK?
Darhol javob beraman. Hammasi oddiy – loyihasiz yaxshi uy qurib boʻlmaydi. Bu tashxissiz bemorni davolashdek gap. Natija sizni yo umuman quvontirmaydi, yoki amalda nolga teng boʻladi. Qolaversa, uy loyihasining narxi butun qurilish qiymatining bor-yoʻgʻi 3% ini tashkil etadi! Shunday ekan, tavakkal qilishga arziydimi?
Loyiha – bu qurilishning aniq rejasi, materiallar miqdorining hisob-kitobi, barcha zarur tizimlarning loyihasi, qogʻozda mujassamlashgan ORZUINGIZDIR. Shuningdek, qurilish uchun barcha zarur hujjatlarni olishning yagona yoʻlidir. Quyida bu dalillarning barchasini batafsil yoritib beraman.
Mening maqolam uy loyihasiga nimalar kirishi va bu tushunarsiz chizmalarning barchasi qurilishda sizga qanday asqotishi haqida. Aytgancha, mana bu havola orqali bizning shahar tashqarisidagi uylar loyihalari portfoliomizni koʻrishingiz mumkin
Shunday qilib, boshlaymiz, aslida xususiy uy loyihasi bir-biri bilan bogʻliq 4 ta loyihadan iborat: eskiz, ishchi, konstruktiv-muhandislik va dizayn-loyiha. Ularning har biri muhim va har biri sizga kerak boʻladi.
Eskiz loyihasi
Eskiz loyihasidan boshlaylik – bu qurilishga ruxsat olish (arxitektura-rejalashtirish topshirigʻi va muhandislik-texnik shartlar (ART va MTSh)) uchun zarur boʻladigan eng dastlabki umumiy hujjatlar toʻplamidir.
Buni bajarilishi kerak boʻlgan asosiy bosqichlarga boʻlib chiqaman:
Uchastkaning topografik suratga olish ishlarini oʻtkazish. Toposuratga olishning maqsadi – uchastkada joylashgan binolar, daraxt va butazorlar, toʻsiqlar, kommunikatsiyalar va boshqalarni 1 : 500 masshtabda grafik tarzda aks ettirishdir. Qurilish uchun geologik qidiruv ishlarini oʻtkazish. Maqsad – tuproqning koʻtarish qobiliyatini aniqlash. Ikkala qidiruv maʼlumotlari bilan arxitektura kompaniyasiga kelish va uyning eskiz loyihasini kelishib olish. Shundan keyingina, yuqorida sanab oʻtilgan barcha hujjatlar va eskiz loyihasi bilan siz uy qurilishi uchun ruxsatnoma (ART va MTSh) olishingiz mumkin boʻladi.
Ishchi loyiha
Ruxsatnoma olgach, biz ishchi loyihani (aniqrogʻi, uyingizning arxitektura-qurilish qismini) ishlab chiqishga kirishamiz. Men ishchi loyihani qurilish maydonchasida uyni yigʻish boʻyicha «yoʻriqnoma» deb atagan boʻlardim. Batafsil ishchi loyihasiz binoning dastlabki qiyofasini buzmasdan yoki katta miqdorda ortiqcha xarajat qilmasdan uni qurish imkonsizdir.
Ushbu qismga meʼmorning eskizlarga batafsil izohlari bilan rejalari, barcha inshootlar va detallarning oʻlchamlari, deraza va eshiklarning rejaga bogʻlanishi, barcha fasadlar, oʻlchamlari va qiyalik burchaklari koʻrsatilgan tom rejasi, uyning uchastkaga bogʻlanish rejasi, ikkita kesim kiradi. Qoʻshimcha tarzda, meʼmoringizdan qurilish va konstruktiv yechimlar boʻyicha tavsiyalar va sharhlar beriladi.
Konstruktiv-muhandislik loyihasi
Nomidan koʻrinib turibdiki, u ikki qismga boʻlinadi, shuning uchun ularning har biri nima uchun javob berishini qisqacha aytib beraman.
Konstruktiv qism poydevordan tortib deraza romigacha boʻlgan uyning barcha elementlariga tushadigan yuklamalarni hisoblash uchun javob beradi. Aynan shu qismga tayanib devorlar, qavatlararo orayopmalar turi, toʻsinlar joylashuvi tanlanadi. Shuningdek, poydevor gidroizolyatsiyasi, issiqlik izolyatsiyasi va shamollatish boʻyicha barcha javoblarni aynan shu yerda topasiz.
Loyihaning muhandislik qismiga isteʼmol qilinadigan resurslar quvvatini hisoblash, issiqlik va elektr yuklamalari, ventilyatsiya, kanalizatsiya va suv taʼminotini rejalashtirish kiradi. Yuqorida sanab oʻtilgan barcha tizimlarni loyihaning ushbu boʻlimidagi chizmalarda topasiz. Har bir tizim (ventilyatsiya, kanalizatsiya, isitish va h.k.) alohida va bosqichma-bosqich ishlab chiqiladi.
Konstruktiv-muhandislik loyihasi uyingiz xavfsizligi va barcha qurilish materiallarini hisoblab chiqish uchun zarur.
Uyning dizayn loyihasi
Va nihoyat, eng oxirgisi, lekin ahamiyati jihatidan kam boʻlmagani – uyning dizayn loyihasi.
Oʻylaymanki, siz ushbu loyihaga obyektning eksteryer va interyer bezaklari kirishini tushunib boʻldingiz. Ehtimol, bu qurilishda eng muhim narsa emasdir, lekin baribir fasad va tom materiali qanday boʻlishini, poydevor, ayvon va terassa qanday bezatilishini oldindan bilgan maʼqul.
Bizning studiyamizda siz shuningdek interyerda mebellarni joylashtirish rejasiga ega boʻlasiz, bu sizga boʻlajak uyingizni yanada batafsil tasavvur qilishga yordam beradi. Albatta, uy loyihasiga qoʻshimcha ravishda har doim interyer loyihasini ham buyurtma qilishingiz mumkin.
Mana bu havola orqali biz allaqachon amalga oshirgan shahar tashqarisidagi uylar interyeri dizaynini koʻrishingiz mumkin.
Xulosa qilaman: AGAR siz qurilishga ruxsatnoma olishni istasangiz, AGAR oilangizning koʻp yillari va bir necha avlodlari uchun yaxshi, ishonchli uy qurmoqchi boʻlsangiz va NIHAYAT AGAR mablagʻingiz hamda kuchingizni behuda sarflashga odatlanmagan boʻlsangiz, uy loyihasi sizga shunchaki zarur!
Oʻz ORZUYINGIZDAGI uyga ega boʻlish uchun bu yerda ariza qoldiring!
Tekshirilgan va kerakli maʼlumotlarni topish uchun blogimga nazar solib turing.
